Home / Taariikh / Dagaalkii Dhagax-tuur iyo Dilkii Xaawo-Taako

Dagaalkii Dhagax-tuur iyo Dilkii Xaawo-Taako

Kolkii shacabka Soomaaliyeed ay u, muuqatay inay arrintu u janjeerto in Qaramada Midoobay go’aan ku gaareyso in Soomaaliyada Koonfureed loo dhiibo Talyaani si uu gobinnimo u gaarsiiyo ayaa shacabka Soomaaliyeed iyagoo taasi ka dhiidhinaya ayay 5-tii Oktoobar sanadki 1949-kii dalka oo idil bannaanbax isugu soo bexeen.

Ciidamadii Ingiriiska ee Muqdisho joogay waxay u soo dhaqaaqeen inay kala eryaan dadkaasi ku banaanbaxayay meesha markii dambe loogu magac daray ‘Dhagax-tuur’. Soomaalida waxaa markaasi hub u ahaa dhagxaan ay isaga dhicinayeen ciidankii Ingiriiska ee soo weeraray. Ciidankii Ingiriiska tacshiirad aan loo kala aabbayeelin ayay ku fureen dadkii, illaa 8 qof dad gaaraya ayaa Soomaalidii ka geeriyootay. Ciidamadii Ingiriiska oo kaliya maahayn waxa weerarka soo qaaday ee waxaa wehliyay Soomaali calooshood-u-shaqeystayaal ah. Inkastoo Soomaalidaas qaarkood ay rasaasta kor u ridayeen, haddana qaar iyaga ka mid ah ayaa la sheegay inay dadka hoos ugu dhigeen. Intay ciidamadii Ingiriiska iyo Soomaalidii la shaqeyneysay ku maqnaayeen meeshii Soomaalidu isugu soo baxday, ayaa rag Soomaali ah ay weerar ku qaadeen xaruntii SYL oo ku dhoweyd meesha hadda ah Tiyaatarka Qaranka.

Raggan ayaa xarunta soo weeraray, iyadoo markaasi xarunta laga maqan yahay, bannaanka ‘Dhagax-tuurna’ lagu kulansan yahay. Waxaa xarunta ku sugnaa dad aad u yar oo ay ka mid ahayd Allaha u naxariistee Xaawo-Taako. Raggii xarunta soo weeraray waxay fallaar wadnaha kala heleen Xaawo-Taako oo goobtaasi ku geeriyootay. Xaawo Cusmaan (Xaawo-Taako) waxay ka mid ahayd haweenkii ugu firfircoonaa ee SYL ka tirsanaa xilligeeda. Dilkeeda Somaali oo dhan waa ka xumaatay.

About somaliwi